ನಾರಾಯಣದರ್ಶನ- ಕೃತಿ ಅನಾವರಣ ಮತ್ತು ವಿಮರ್ಶೆ

ಇತಿಹಾಸ ಪ್ರಸಿದ್ಧ ಮಡಿಕೇರಿಯ ಓಂಕಾರೇಶ್ವರ ದೇವಾಲಯದಲ್ಲಿ 54 ವರ್ಷಗಳ ಕಾಲ ಸೇವೆ ಸಲ್ಲಿಸಿದವರು ವೇದಮೂರ್ತಿ ಬಿ.ಜಿ. ನಾರಾಯಣ ಭಟ್ಟರು. ಇವರು ಪುರೋಹಿತರಷ್ಟೇ ಅಲ್ಲದೆ ವಾಗ್ಮಿಯೂ, ಜ್ಯೋತಿಷಿಗಳೂ ವೇದವಿಚಕ್ಷಣರೂ, ಬರೆಹಗಾರರೂ, ಕವಿಗಳೂ ಮೇಲಾಗಿ ಸಾಮಾಜಿಕ ಚಿಂತಕ, ಎಮರ್ಜೆನ್ಸಿ ಮೊದಲಾದ ಸಮಯಗಳಲ್ಲಿ ಹೋರಾಟಗಾರರರೂ ಆಗಿದ್ದು, ಅನೇಕ ಧಾರ್ಮಿಕ-ಸಾಮಾಜಿಕ ಕಾರ್ಯಗಳ ಮುಂಚೂಣಿಯಲ್ಲಿದ್ದರು, ಭಕ್ತಾದಿಗಳ ನೆಚ್ಚಿನ ಅರ್ಚಕರಾಗಿ ಸುಮಾರು ಸಾವಿರಕ್ಕೂ ಮಿಗಿಲು ವಿವಾಹ ನಾಮಕರಣ, ಐನೂರಕ್ಕೂ ಮಿಗಿಲು ಸತ್ಯನಾರಾಯಣ ಪೂಜೆ, ಸಾರ್ವಜನಿಕ ಉತ್ಸವಗಳ ಕರ್ತವ್ಯಗಳನ್ನು ನಡೆಸಿದ್ದಷ್ಟೇ ಅಲ್ಲದೆ ತಮ್ಮ ಸಂಘಟನಾಶೀಲತೆಯ ಬಲದಿಂದ ತೆಪ್ಪೋತ್ಸವ, ಷಷ್ಠಿ, ಶಿವರಾತ್ರೆಗಳ ವೈಭವಕ್ಕೆ ಕಾರಣೀಭೂತರಾಗಿ ಜನಾನುರಾಗಿಗಳೂ ಆಗಿದ್ದರು. ಮೂಲತಃ ದಕ್ಷಿಣಕನ್ನಡದವರಾಗಿದ್ದು ತಮ್ಮ ಹದಿನಾರನೆಯ ವಯಸ್ಸಿನಲ್ಲೇ ಓಂಕಾರೇಶ್ವರ ದೇವಸ್ಥಾನಕ್ಕೆ ನಿಯುಕ್ತಿಯಾಗಿ ತಮ್ಮ 70 ನೆ ವಯಸ್ಸಿನವರೆಗೂ ಅವಿರತವಾಗಿ ಕರ್ತವ್ಯ ನಿರ್ವಹಿಸಿದವರು ನಾರಾಯಣ ಭಟ್ಟರು. ಇವರ ಕುಟುಂಬ ಮೊದಲಿಗೆ ಕೊಡಗಿನ ಲಿಂಗರಾಜ ಅರಸರಿಗೆ ರಾಜಪುರೋಹಿತರಾಗಿ ಸೇವೆ ಸಲ್ಲಿಸಿ ಅನೇಕ ಮನ್ನಣೆ, ಬಿರುದು, ಪುರಸ್ಕಾರಗಳನ್ನು ಪಡೆದಿತ್ತು. ಓಂಕಾರೇಶ್ವರ ದೇವಾಲಯದ ನಿರ್ಮಾಣದಲ್ಲಿ ನಡೆದ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ನಾರಾಯಣ ಭಟ್ಟರಿಗಿಂತ ಐದಾರು ಪೀಳಿಗೆಯ ಹಿಂದಿನ ಹಿರಿಯರು ಸೇವೆ ಸಲ್ಲಿಸಿದ್ದು ಇತಿಹಾಸದ ಪುಟಗಳಲ್ಲಿ ದಾಖಲಾಗಿದೆ. ನಾರಾಯಣ ಭಟ್ಟರು ಅರ್ಚಕರತ್ನ ಬಿರುದು ಸಹಿತ ಅನೇಕ ಪ್ರಶಸ್ತಿ ಪುರಸ್ಕಾರಕ್ಕೆ ಪಾತ್ರರಾಗಿದ್ದರು.

 ಕಳೆದ 2019 ಸೆಪ್ಟೆಂಬರ್ 18ರಂದು ಬೆಂಗಳೂರಿನಲ್ಲಿ ಅಲ್ಪಕಾಲದ ಅಸೌಖ್ಯದಿಂದ ದೈವಾಧೀನರಾದ ಕೀರ್ತಿಶೇಷ ವೇದಮೂರ್ತಿ ಬಿ.ಜಿ. ನಾರಾಯಣ ಭಟ್ಟರ ಪ್ರಥಮಾಬ್ದಿಕ ಶ್ರಾದ್ಧವನ್ನು ಇತ್ತೀಚೆಗೆ (ಅಕ್ಟೊಬರ್ 5, 2020) ನೆರವೇರಿಸಲಾಯಿತು. ಆ ಸಂದರ್ಭ ಮಡಿಕೇರಿಯ ಕಲಾಸಂಸ್ಥೆ ನೂಪುರಭ್ರಮರಿ ಯಿಂದ ಪ್ರಕಟಿಸಲಾದ ಬಿ.ಜಿ. ನಾರಾಯಣ ಭಟ್ಟರ ಆತ್ಮಕಥನ ಮತ್ತು ಸಂಸ್ಮರಣಾ ಕೃತಿ *ನಾರಾಯಣದರ್ಶನ* ವನ್ನು  ಸವಣೂರಿನ ಅಗರಿ ಬೆಟ್ಟುಕಜೆಯಲ್ಲಿ ನಡೆದ ಸರಳ ಸಮಾರಂಭದಲ್ಲಿ ವೇದಜ್ಞರಾದ ಬಳ್ಳಕ ಶ್ರೀಪತಿ ಭಟ್ ಮತ್ತು ಕಂರ್ಭಿ ಗಣಪತಿ ಭಟ್ಟರು ಅನಾವರಣಗೊಳಿಸಿದರು.

ಈ ಕೃತಿಯು ನಾರಾಯಣ ಭಟ್ಟರ ಆತ್ಮಕಥನ- *ನಾರಾಯಣಾಯನ* ದೊಂದಿಗೆ ಕೊಡಗಿನ ಅವರ ಒಡನಾಡಿಗಳು, ಗಣ್ಯರು ಅನಿಸಿಕೆ, ಅಭಿಪ್ರಾಯಗಳನ್ನು ಒಳಗೊಂಡಂತೆ ಸುಮಾರು 68 ಜನರ ಬರೆಹಗಳನ್ನು ಪ್ರಕಟಿಸಿದ ಸಂಸ್ಮರಣಾ ಕೃತಿಯೂ ಆಗಿದ್ದು, ಸುಮಾರು 324 ಪುಟಗಳ ಈ ಕೃತಿಯ ಬೆಲೆ 200ರೂ.